新任一哥李明逵九七年負責回歸保安工作時，下令喺會場外高聲播放貝多芬交響樂曲，以掩蓋示威者聲浪，呢單嘢發生咗咁耐，但好多人仍然記憶猶新，繼幾日前長毛以「其人之道」，喺警察總部外播放貝多芬交響樂曲向新一哥「贈興」後，噚日一哥出席獅子會午宴時，一名獅子會會友又「舊事重提」，問一哥工作壓力咁大，辦公室會唔會有好多唔同類型嘅音樂。
李一哥聽到咁嘅問題，當然唔係咁合皮，但仍然好幽默咁話「好多音樂其實已經過咗期」，又話六、七年前嘅嘢重攞嚟講，講得多都「噚」，市民冇乜興趣，一副唔想多講嘅口脗。鬼叫你以前做過呢單嘢咩，都唔怪得人哋經常將件事掛喺口邊嘅。
其實講句公道話，李一哥當差幾十年，除咗上述污點，個file都算乾淨，佢噚日重特登為班前線警員打氣，又警告不法分子唔好搞事，警方絕對唔會手軟云云，講完呢番話之後，幾百名獅子會會員即刻拍晒手掌，直情當咗一哥係偶像，有個做咗私家偵探四十幾年嘅會友更當場透露一哥做警司嗰陣曾加入廣東獅子會，高呼一哥係獅子會嘅光榮，大家繼續支持佢，真係擦鞋擦到出晒面。
傳真︰2623-9278
電郵︰