陳慧琳早前以二十萬請來荷李活演藝老師教她演戲，她前晚和劉德華出席新戲優先場時透露稍後會接演一個類似《無間道》中黃秋生飾演的黃Sir角色，黃秋生更向她自薦，以一萬元教她演戲。
陳慧琳（Kelly）前晚與劉德華及杜汶澤到銅鑼灣及灣仔出席《無間道Ⅲ終極無間》的兩場優先場，導演劉偉強及麥兆輝都有到場。眾人除獲贊助商贈送禮品外，又與觀眾玩遊戲，十分開心。
Kelly為拍好《無間道Ⅲ》，特地花了二十萬請荷李活演藝老師來港教她演戲，她前晚接受訪問時透露她稍後會接拍一部電影，飾演女版黃Sir，還請來黃秋生教授她演技，Kelly說：「我都覺得自己今次表現進步咗，我最近接咗部戲要做女強人，好有智慧，頭腦好清醒，同《無間道》入面嘅黃Sir好似，靠內心戲同眼神嚟發揮。」
Kelly謂一次她與黃秋生閒聊時，問對方有沒有好老師介紹，秋生即自薦，Kelly說：「佢話不如由佢嚟教我，佢話收一半錢都肯，後來又話收一萬都得，都唔知佢係唔係，佢肯就梗係好啦。」Kelly又表示其父已看過她的演出，大讚她演技有進步，尤其喜歡她痛哭的一場戲。
而華仔接受訪問時，提到好友梅艷芳日前缺席慈善義賣活動，有指阿梅身體狀況欠佳，華仔表示：「無論媒體點揣測，作為朋友係唔應該講啲乜嘢，我哋要尊重佢嘅工作同意願。」至於有指阿梅辭演《十面埋伏》，華仔說：「佢主要嘅戲都同我拍，我要去台灣金馬獎，之後去美加做巡迴演唱，冇我佢點拍？總之我同佢醫生好熟，如果醫生同我講佢唔應該去拍，我唔需要問阿梅意見，我都唔會畀佢去拍，但佢𠵱家就好穩定冇問題。」
華仔又謂未聽聞阿梅於明年再開演唱會，他說：「佢為咗休息停咗好多工作，連美加演唱會都停，𠵱家休養期間。」華仔後日要去美加演出，可能無法出席柯受良喪禮，他說：「去到當然會去，去唔到會好遺憾。」
採訪：何永寧、攝影：林德雄
