讀者RaymondWong見我杜撰一封中四女生給L君的信，照辦煮碗仿L君回信給中四女生，內容笑到我肚痛。雖然L君已經收聲，打算小事化無息事寧人。網友沒喫和頭酒，照樣在池邊吹春水，虛擬劇情，繼續創作網上揼骨仔與揼骨妹互相踢爆的劇本，自娛一通。
劇本不妨走懸疑路線，由網友揪出幕後黑手。鎖定目標之後，替L君出主意反擊。點反擊法？黑手唔係黑手黨，就算係，斷估都會懼怕黨中之霸的共產黨。建議L君閃電加入共產陣營，撈番個人大政協做，有乜依郁，揸住阿公碌竹，當碌竹係尚方寶劍包冇撞板。如果趕不及入黨，連人帶銀加入民建聯頂馬力個秘書長空缺來做，鎮攝對方的功效雖然打個八折，仍是可行方案。最堅硬的還擊措施，是2007年出來選特首。由今日開始，呼籲一人一票選特首。包底闊佬搖身變做民主L，網友同佢已經熟絡晒，票源穩固，隨時跑贏中方欽點的懵佬出閘。L君報仇，十年未晚。對方還想索二億？得，叫佢喺添馬艦一連十日表演乾鯁乓乒波啦！
若問L君做特首，豈非開特區大笑話？香港已經榮登笑話天堂，攬搞笑之都的美譽多時矣。L君勝在唔怕醜，比老董棟篤惹趣。最好搵埋省鏡靚女做司長協力，一劉一鳳雙撲無間，日日都像睇港產片，天天都似捕鱷節；世界咁大，邊個地方及得上騎呢癲狂香江美麗都！