中央挺港招式多，CEPA、自由行兼減東江水水費，家陣重話要減慢深圳港口發展，以免威脅香港碼頭業務。其實CEPA與自由行唔算特別優待，香港受之無愧，但阿虎一諗起溫總為國內人民的溫飽問題憂心，香港又點可以接受中央補貼東江水，點可以阻住深圳發展呢？如果阿董接受呢啲挺港措施，簡直係陷香港人於不義。其實中央只要放寬國內資金投資本港金融市場，已可令香港萬事大吉。
港股噚日再創29個月新高，早段高見12674，但午後回吐，收報12594，升39點，成交157.58億元。
里昂最近都算得心應手，推介嗰隻升嗰隻。里昂調高江銅（358）目標價至4.55元，江銅噚日即勁升8.57%；唱好中信金融（183）價值會被市場重估後，該股噚日亦升5%至4.20元。里昂又發功唱好電視廣播（511）要見50元，下周唔知電視廣播會唔會大幅造好呢？據聞公司就快公布獲得廣東落地權，可增加盈利能力。隻股有消息跟尾，相信芬佬亦會跟進。
中銀香港（2388）近期屢創新高。黑客話，據講中銀主要靠中資大戶支持，雷曼及美林等美資則開始出貨獲利，出現大撼大情況，人民幣清算行誰屬即將公布，如果投資者趁好消息出貨，支持中銀的中資將陷於苦戰。
IMI（585，前身寶途）賣咗聖誕樹業務後，以動畫做主業，中期純利大跌95%至1449萬元，雖然係預期中事，股價仍受拖累，下跌10%至1.69元。大家好似冇留意佢會同DreamWorksTelevisionAnimation合作，其實可為動畫業務帶來無限憧憬，當新股熱潮過後，此股隨時會變成熱炒對象。
阿虎