幾個禮拜，喺大馬路撞到老波骨，俾佢捉住傾幾句，一傾便不能自休，為免互相阻住時間，於是約下午飯之期，夾夾吓，要二十日之後先至再見面。
老波骨二十幾歲就縱橫球場，後來香港足球水準大跌，冇人去球場，佢亦唔玩。呢日到上海總會，佢任由夥計寫菜，話明唔好寫咁多。夥計送來一人一大碗陽春麵，左丁山心諗：「又有咁清嘅？」隨後夥計再送上一碟濃濃密密嘅蟹粉翅，用嚟撈麵嘅！於是吃其蟹粉翅撈麵，食一碗就飽到頂住個胃，再吃蟹粉小籠包，已覺得好勉強咯。
老波骨話：「我識好多傳媒界啫，當年羅燦讀書嗰陣，同佢細佬跟我哋踢預備組，好多位記者𠵱家已經做咗副老總、老總咯！」既然咁有經驗，傾偈自然天南地北，佢忽然話：「自由行最益邊個？」左丁山話：「中央救港挺董吖嘛，梗係益董生啦！」老波骨話：「你知一不知二，益晒鏵哥至真，中央准一億人來港自由行，當然唔少人行埋過去澳門，遊客來港買少少嘢，去澳門就走入葡京貢獻燊哥，你話華叔鏵哥邊個得到實惠嘞！」咦，又係噃，入到葡京，咁易贏錢咩，梗要放低銀両先至鬆得人。老波骨話燊哥一年繳稅一百億畀澳門特區政府，即每日二千七百幾萬，而燊哥肯定每日收銀七八千萬，夠厲害未，老波骨講：「明年更多人嚟自由行，正是明益香港，暗益澳門。」五十萬人上街，震動中央，急急挺董救港，鏵哥燊哥真係笑到震！