樓盤改名，對物業好重要，明年重槌出擊嘅恒基地產，頭炮西灣河碼頭廣場項目，遲遲唔能夠應市，其中一個原因都係同個盤芳名未定有關。
恒基地產營業部總經理當勞（張炳強）透露，集團嘅西灣河碼頭廣場項目，交畀主席四叔（李兆基）過目嘅樓盤名，已經有好幾百個，但係都冇一個啱佢心意。
據講四叔對恒基旗下住宅樓盤改名十分重視。西灣河碼頭廣場項目有二千個單位，又係集團近年開售重點樓盤，更加要睇實啲。
蘭西建議，舉行一個改樓盤名比賽，既可以集合各方意見，為樓盤改一個合適名字，又可以有宣傳作用，一舉兩得。其實呢個樓盤坐落係港島東區，屬市區樓盤，買家已經吼到實，選用咩名字，對銷情影響應該唔大。
聖誕節就到，賣樓嘅唔會有假放，所以售樓處甚至示範單位，都會布置到好有聖誕氣氛，等員工可以感受吓節日氣氛。
九倉深井碧堤半島噚日率先開放兩個以聖誕節做主題嘅示範單位，已經布置好晒，客廳有雪人公仔同埋聖誕樹，睡房有聖誕老人衫，其他好似聖誕襪同聖誕帽，重有小擺設隨處可見，𠵱家已經感受到好濃厚嘅氣氛。
聖誕節就到，𠵱家大家都時興喺網上送聖誕卡，蘭西啱啱收到長實嘅四季雅苑聖誕卡。呢個聖誕卡最初係屋苑外貌，然後就見到落雪場面，跟住重愈落愈多，夠晒聖誕氣氛。
發展商網上送聖誕卡，夠環保，而且又有動畫睇，當然唔少得嘅就係可以乘機宣傳吓公司，或者公司嘅樓盤，總之就係一舉數得。
大時大節，發展商會送小禮物畀傳媒友好，噚日香港興業做聖誕老人，送咗份好精緻嘅聖誕禮物畀大家。淨係外形已經好應節，係一棵紅色嘅聖誕樹，裏面有迷你護膚套裝，外形精美又實用。
蘭西記得，香港興業舊年賣東涌藍天海岸嘅時候，就送聖誕樹做禮物，今年都唔例外，包裝都要用番聖誕樹，真係有原則。
蘭西最近喺傍晚時份經過西灣河太康街，發覺燈火通明，原來多咗三間代理行，就係香港置業、中原同美聯，斜對面就係恒基明年第一炮大型樓盤西灣河碼頭廣場。
蘭西問過中原區域經理唐詠勤，佢話大家都係開張一個月。個舖下周一會搞開幕儀式，重請嚟太古馬淑貞剪綵。
唐詠勤話，中記間分行大過之前嘅分行，可以請多六個人，主力做二手，西灣河碼頭廣場開售就可以做埋一手，而且已經收到唔少查詢。
蘭西
電郵地址：
