同神田UNO形象相似嘅梅宮Anna，以前成日俾人攞嚟比較，但自從佢生咗個女百百果之後，已經修心養性，正當神田重俾人寸佢吊高嚟賣，梅宮就極力洗底轉做平民，希望同fans拉近距離。
梅宮生咗女之後，經常喺雜誌寫生活享受專欄，佢教人去夏威夷點樣四圍格價，例如乜嘢時候做spa平啲，或者邊間鞋舖啲貨最新最平！對於當夏威夷係第二故鄉嘅日本女人嚟講，呢啲貼士真係好有用㗎，所以佢嘅專欄好受歡迎。
梅宮話自己雖然唔使憂柴憂米，但佢嘅價值觀同其他人唔同，明眼人一睇就知佢係寸緊日本藝能界嘅富貴同行，梅宮話：「我係普通人啫，我唔會好似人哋咁亂使錢，雖然我都好鍾意俾人捧到好似個公主咁，但我有車會自己揸番，有行李亦會自己攞，唔會乜都要經理人保護！」