民主黨區選大勝，但黨鞭司徒華喝住唔准大事慶祝，話重有好多嘢要做。負責選情嘅李永達都擔心民主派經此一役後會太心雄，以為贏梗，而其實要攞夠符合《基本法》規定，啟動修改選舉辦法機制嘅四十個議席好難，𠵱家睇嚟都冇乜可能㖭，所以達仔話，一定要同工商界以及市民溝通，口號係「民主派明年就算勝出，攞到多過三十席，都一定唔會亂嚟，一定有商有量。」
達仔佢哋梗係贊成盡快展開政制討論，圓桌又好，方桌又好，但係中央代表就唔使咁早嚟，等港人傾掂先，對於吳光正想以不變應萬變，達仔就話分分鐘搞到○六年元旦五十萬或更多人上街。
明年立會選舉嘅內外協強調都唔易做，因為一定爭崩頭，所以達仔下周先去吳哥窟唞唞，返嚟再戰○四。
重有，民主黨做咗個小統計，指上屆委任有成四十三人係商家，比其他專業都要多，希望政府今次唔好再重商輕其他，唔委任就最好。
傳真︰2623-9278
電郵︰