若你有留意開車壇動態的話，相信都會知道德國寶馬車廠，會推出6系跑車嘅消息；然而，新車雖未正式抵港，但廠方於日前已公布會為其推出開篷版本，並有望於明年初正式推出㖭！
從相片中可以睇到，全新6系開篷版嘅造型與Coupe硬頂版相近，但改用開關需時20秒，並備有黑、灰兩色選擇嘅電動軟篷頂後，頓時變得更富吸引力；當然唔少得重有四輪大口徑跑車合金胎軨，以及雙出式跑車尾喉作配襯啦！除此之外，跑車化車廂布局及承托力十足嘅跑車皮椅配搭，乘坐貼服舒適之餘，加上齊全車廂設備，享受更見愜意。
暫時已知645Ci開篷版會以一台4.4公升V8偈作動力核心，並附有Bi-VANOS等技術，動力輸出狠勁有力（馬力：333ps/6100rpm，扭力：45.9kgm/3700rpm），性能表現毋庸置疑。有興趣嘅車迷，不妨密切留意新車在港嘅推出日期喇！