和黃（013）昨日生龍活虎，帶動大市唔在講，本身急升3元，升幅5.6%，收57元，成交金額將近21億元，幾乎拍住滙豐（005）。一聲話下周一舉行發布會，講喺本港推出3G，股價即刻唔同。
和黃急升，亦創造咗1項紀錄，就係升幅最勁嘅20隻窩輪，和黃Call輪佔咗17件，就算係第17件，升幅亦都有33%。升得最勁嘅則有80%，係9392，呢件係鎖定回報輪，而且係末日貨，炒到月底夠鐘，收報1.8仙，唔係齋升，有328球易手，金額都有5百萬。由於唔係正常輪，所以要睇清楚行使條款至好玩。
先幾日提過嘅和黃Call輪9914，死吓死吓，個幾星期內由高位碌落，大散4成半，一朝報仇，單日升57%，收42.5仙，升幅喺龍虎榜上排第三，成交金額亦係排第三，將近1億元。呢件下月下旬到期，溢價3.9%，槓桿率13.4倍，仍然係未來和黃Call輪焦點。
好多Call輪升到人驚，想趣趣哋搵啖食，留意中移動Call輪9902。恒指若然繼續去，重磅股有着數，大市會預埋中移動（941）。兼顧成交、爆炸力、風險程度等條件，9902係正路之選。
章 盛