四大樂壇頒獎禮舉行在即，女歌手及金曲大獎熱門容祖兒，日前在尖沙嘴的Fendi及Joyce等名店內細選頒獎禮戰衣，她已預算花三十萬元置裝。
容祖兒日前偕助手往尖沙嘴的名店shopping，準備為舉行在即的四個樂壇頒獎禮揀選戰衣。
當日身穿便服的祖兒先到位於北京道的名店Fendi揀衫，她一進入店內，立即試戴太陽眼鏡及手袋，接着便登上二樓看女裝，約三十分鐘後，祖兒才離開。
及後祖兒乘坐保母車，前往Joyce睇衫，她到埗後隨即滿場飛，並將一件粉色的春季新裝放在身上，對着鏡子左照右照，由於店內已添置不少春裝，祖兒卻想揀選一些秋冬服飾，故她便走到一邊看時裝目錄，未幾，店員便取出一件長褸給她試穿。
以前祖兒的身形頗圓潤，但她纖體成功，身形確實比前弗了不少，即使穿上厚厚的長褸也未見臃腫。其間祖兒行到香水專櫃前，試嗅香水紙辦。
祖兒今年在樂壇成績大有進步，除是女歌手獎項大熱人選外，其主唱的《我的驕傲》，更甚有機會問鼎歌曲大獎。
昨日本報致電祖兒的經理人霍紋希時，她在電話中表示祖兒已預算花三十萬元置裝，她說：「除咗四個頒獎禮之外，重有無綫嘅《勁歌》季選同埋籌款節目《歡樂滿東華》，所以都要花成幾十萬買衫。」
至於獎項方面，霍紋希說：「上年祖兒講過做第二好過做第一，今年大家都覺得佢嘅成績好好，所以佢對自己同其他人已經有咗個交代，就算今次做第二，佢都一樣咁開心。」
採訪、攝影：娛樂突發組
