馮孝忠係星展銀行財資部董事總經理，平時研修佛教，故此面對瞬息萬變嘅外滙市場，壓力無數，仍然定過抬油，講說話條理分明，有時重有啲慢條斯理㖭。以前左丁山面試過一位MBA，佢說話快到有啲亂，近乎口吃㖭，最初以為佢思路不清，但耐心啲聽吓，呢位先生近乎IQ爆棚。銀行於是請咗佢，訓練完畢，送佢入交易室（DealingRoom），佢果然成為一位出色交易員，反應快到冇得頂，佢說話之模糊不清，皆因佢個腦轉得快過條脷，幾件事想一齊講也。
馮孝忠就靠冷靜取勝，一早叫人買南非蘭特，聽者當然得救。呢日佢響電台講，大學生想做外滙，最好先讀數學、數量分析、數量財務，總之冇Quantitative能力，就冇機會，佢哋嘅部門，有好幾位數學博士㖭，讀純數都無拘㗎，好過讀會計、經濟喎。
數學博士吃香，皆因近幾年攞諾貝爾經濟學獎嘅教授，都係數量統計底，佢哋發明啲期權估值方法，測試方式已大量應用於衍生工具、結構性產品（StructuredProduct），於是銀行、證券行猛咁請一啲數量財務（QuantitativeFinance）與讀純數畢業嘅學生，博士更啱，專門替銀行研究、生產一啲「結構性衍生工具」嚟賣畀投資者，正式係無中生有，正常情況之下，薄利多銷，穩賺不賠，銀行完全冇風險，除非遇上另一次俄國賴債，累死LTCM啦。各位理科生今年選JUPAS，不妨考慮讀純數或者數量財務呀！