香港內部消費有復甦迹象，點解咁講，睇吓律師公會嗰鋪豪氣就知。
律師公會閉門聆訊有「人民律師」之稱嘅謝偉俊嘅裸照風波及賣廣告拉客，話謝偉俊「違反專業操守」。閉門聆訊，律師公會特登揀咗文華酒店最豪嘅告羅士打廳，每日四粒鐘，連酒水食物租金六千幾銀，五日埋單找數近四萬。
律師公會人多勢眾，判決阿Paul輸，話都冇咁易，按規例，敗訴嗰一方（幾乎可以肯定係謝偉俊）要找數，所以律師公會叫點最靚嘅美食，包括兩種空運抵港嘅士多啤梨同兩隻法國礦泉水，實行搭一程免費大食會順風車，諗住最終有謝律師找數。
文華啲侍應話，阿Paul一路自辯，成班律師就眼仔碌碌昅實啲精美食品，似乎鍾意開懷大擦，多過對謝偉俊講乜有興趣。
既然係咁，想謝偉俊破產好易，律師公會不如下次移師北京，租成個故宮嚟聆訊咪重威？租金都係一日一百萬啫。
傳真︰2623-9278
電郵︰