新車速報：<br>新版本田Civic變臉再出戰

新車速報：
新版本田Civic變臉再出戰

未踏入2004年前，經已有唔少新車款推出，而本田代理繼Facelifted新版Stream抵港後，又運嚟全新Facelifted版嘅Civic車系；重新包裝嘅外形，滲有濃厚房跑車特色外，加強咗隔音嘅平地台車廂，匹配高級真皮椅，令呢部Civic新貴較前變得更具號召力呢！

記者、攝影：陳偉林
ImageGirl：Sylvia

過往，本田Civic主要針對較年輕嘅用家市場，造型包裝總離不開一份房跑車本色，深受車迷追捧；惟近年車廠一改作風，想追求更高層次嘅成熟一派，但效果卻見不得成功。

■全新鬼面罩及氣霸組合，看來充滿動感。

■四輪15吋合金胎軨配搭，帶出有高循迹性。



新包裝　添房跑味
然而，剛抵埗嘅2004年新版Civic，卻用上全新設計嘅車頭組合，既有簡潔粗豪嘅鬼面罩，又有渾然一體嘅泵把連氣霸裝置，加上一對惡形惡相嘅高聚焦大燈連霧燈組合，配合上豪華版獨有兩邊車身裙腳，令人看來時尚之餘，又能烘托出一份吸引嘅房跑車色彩㗎！

■豪華版備有兩邊車身裙腳，予人靠貼地面之感。

■高置式獨立尾燈裝置，既清晰又奪目。



車廂強化　安全設備
此外，新座艙設計保留有桃木修飾之餘，兩排高級皮椅既有獨立頭枕，又有前後標準三點式安全帶組合，還加有後排Isofix兒童安全椅固定裝置，匹配全車電窗、門邊電鏡及電天窗外，重有高級10+1CD音響連恒溫冷氣，響強化咗隔音設備嘅車廂中，聆聽音樂可謂至愜意又舒服呢！

■新車座艙鋪排瑰麗吸引，望落好有大車風範。

■三個獨立圓表裝置，勝在清晰又易看。

■渾然一體嘅中控台，有齊10+1CD音響同恒溫冷氣。



底盤穩妥　操控感高
新車沿用一台1.5公升直4偈，匹配一套CVT無段變速自動波箱，起跑加速有力又敏捷；四輪改配上高抓着力及寧靜嘅輪胎配搭，加上沿用出眾嘅底盤懸掛設計，明顯帶出有恍如房跑車嘅高循迹行車演繹㖭！

■一套CVT無段變速自動波，有暢順加速反應。

■前排之間既有手枕，又有開放式雜物匣。

■前後兩排高級皮椅，承托力高又貼身。

■原廠電天窗前後，設有獨立房燈，重有兩邊扶手裝置。

記者評語：新版表現更佳
全新Facelifted版加入新面孔，更見活力同動感外，車廂隔音效果亦較前有改進，加上換裝較咬地又寧靜嘅輪胎配搭，重帶出有可靠出眾嘅循迹感呢！

■平尾地台上，備有獨立杯座及煙灰缸。

Sylvia評語：乘坐舒適享受愜意
部車外形入時又見房車味道，車廂兩排高級皮椅，既貼服又舒適，加上有唔少桃木作修飾，予人講究又愜意之感㖭！

本田Civic1.5VTi規格
引擎：1493cc直4SOHC
馬力：115ps/6500rpm
扭力：14.2kgm/4800rpm
傳動：無段變速CVT自動波，前輪驅動
懸掛：（前）麥花臣支柱（後）雙搖臂
制動：（前）透氣碟（後）碟式（ABS）
輪胎：195/60R15BridgestonePotenzaRE88
尺碼：4470×1695×1440mm
軸距：2620mm；車重：1180kg
新車售價：$152,800（天窗版）
車輛提供：合群汽車（28278622）

■新車沿用一台1.5公升VTi偈，起跑加速有力之外，重有出眾操控感。

同級對手比較

萬事得Mazda3
引擎：1498cc直4DOHC
馬力：113ps/6000rpm
扭力：14.3kgm/4000rpm
尺碼：4485×1745×1465mm
軸距：2640mm；車重：1180kg
新車售價：約港幣13萬起
查詢：萬事得汽車（28931112）
評語：快將於明年初抵港嘅新車系，唔單止外形出眾見跑意，新車底盤結構重予人歐洲車嘅穩妥感，若然車價吸引的話，值得考慮選購。

豐田Corolla
引擎：1497cc直4DOHC
馬力：100ps/5600rpm
扭力：13.9kgm/4400rpm
尺碼：4390×1695×1470mm
軸距：2600mm
車重：1020-1090kg
新車售價：$120,600起
查詢：皇冠汽車（28661020）
評語：喺現時一眾家庭車之中，可謂設備至齊又豪華嘅車款；而一台1.5公升VVT-i偈，重勝在扭力輸出平均又慳油，加上寬敞車廂空間同講究嘅皮椅組合，一直有唔錯口碑及銷量。