香港華人會計師公會噚晚慶祝成立九十周年，喺會展擺咗三十幾圍，都好熱鬧。
身為主禮嘉賓嘅財政司司長唐英年話封嘴唔答問題；新任審計署署長鄧國斌就去打吓關係，恭喜會長黃龍德之餘，重猛話自己好多同學讀會計，新工作充滿挑戰，問題不大，至於稅務局局長劉麥懿明亦俾記者團團圍住。
由於明年立法會改選，各有關人等都有亮相，會計界代表李家祥有啲唔舒服，戴住個口罩都要出席，咁嘅樣，有嘢都暫時唔問住。曾鈺成剛落台，又係話明唔講政治。范太最好，嚟咗一陣都有料到，佢話都聽到好多人會喺港島區出線，選情激烈咪重好囉，即係選民有得揀，以范太今日嘅民望，攞一席唔難，「為咗要保持主席中立嘅形象，一定會做到七月底先至有宣布。」范太有言在先，大家請等一等。
（圖）范太着套功夫衫參加會計師公會晚宴，話咁樣精神啲喎。
傳真︰2623-9278
電郵︰