民主黨前主席李柱銘好鍾意喺立法會引用的士司機嘅講話，因為佢哋代表咗唔少每日喺街上搵食人士嘅心聲。區選過後不久，八方同一位的士大佬傾開偈，佢竟然話自己以前投錯咗票，信錯咗人，23條之後就睇得清清楚楚，知道邊啲人係代表港人利益，佢重點名話唔再信民建聯，講得咁激，真係要曾前主席同馬主席親身聽吓，八方幫佢唔到。
佢重話，自己係一個小市民，有乜意見講都冇人聽，所以要啲議員代表佢哋去發言，去爭取，所以一定要選個代表佢哋聲音嘅政黨。
個司機大佬講得又白又清楚，7.1民主洗禮真係唔可以睇少，唔怪得有人話老董同葉劉係無間道，冇佢兩位推動，港人嘅民主意識唔會咁高，民建聯嘅真面孔亦冇睇得咁清楚。
傳真︰2623-9278
電郵︰