珍妮花洛庇絲（JenniferLopez）今年四月同名牌LouisVuitton簽咗一份二百萬英鎊（約二千六百萬港元）合約，擔任代言人，不過有消息話LV踢走籮霸，唔再同佢合作！
雖然LV發言人強調今次只不過係雙方嘅合約到期啫，但係據聞籮霸過往多次有恃無恐咁叫佢助手去LV，攞走數以千英鎊計嘅手袋、時裝同皮鞋，搞到老細扯晒火，最後惟有出招趕佢走。
雖然今時今日嘅籮霸好霸道，但曾幾何時佢都草根過，好似九七年籮霸同首任丈夫OjaniNoa結婚嗰陣，個婚禮就搞得好簡單，由於當時二十六歲嘅籮霸事業啱啱起步，而二十三歲嘅Ojani就喺餐廳做侍應，所以根本冇人會理佢哋。
當年婚禮喺Ojani個朋友位於邁阿密嘅屋企入面舉行，賓客都有二百人，籮霸重笑到見牙唔見眼，完全陶醉其中。之後佢哋度蜜月就更加低調兼經濟，竟然係去同樣位於佛羅里達州嘅旅遊區KeyWest，但係籮霸一樣玩得好開懷，見到啲動物都鬼咁開心，唔使好似𠵱家咁扮嘢。