好多人話車路士今屆成功只係搵錢堆砌而成，我求大俠都同意，不過，我亦覺得唔能夠抹煞佢哋全隊上下嘅努力。
好以佢哋喺星期二先打完歐冠盃，山長水遠去德國對比錫達斯，但返到英格蘭之後，領隊雲尼亞里就冇畀球員休息，要佢哋即刻操練，備戰對保頓嘅英超聯。前鋒哈索賓基重話，雖然佢哋喺歐冠盃出咗線，但雲尼亞里就唔畀球員喺更衣室講歐冠盃嘅事，要佢哋專心比賽。
咁嚴明嘅軍紀，真係唔係隊隊都做得到，加上佢哋星期六有主場之利，而對手保頓嘅艾拿迪斯同奧高查，啱啱奪得英超本月最佳領隊及球員，相信球迷都心中有數，知道到時買邊隊啦！
早幾日我求大俠咪講過曼聯同利物浦嘅羅致目標，燕豪芬前鋒基斯文未必係好貨色，真係俾我不幸言中。喺燕豪芬星期三贏拉科三比二嘅歐冠盃分組賽，呢位塞黑前鋒重係開唔到齋，加上燕豪芬已經喺今屆歐冠盃出局，佢喺今屆賽事交白卷，對前金靴獎得主嚟講，都算冇面。
祖雲達斯前晚鬥奧林比亞高斯前，據講教練納比一早公布出場陣容，三令五申落場球員要盡贏，終止抨擊咁話，結果贏夠七粒。不過，可能祖記之前幾場唔掂，搞到班球迷唔高興，呢場波得萬幾人入場，事實證明無入場嘅球迷錯過呢場大捷，走寶囉。
意甲帕爾馬戰績咁好，會方本來想留住主力逐鹿中原，可惜呢個如意算盤隨着「總公司」Parmalat財政唔掂而打唔響。呢間食品公司負債過億歐元，急須撲水，再撐唔住間球會，隊波重需要賣球員幫補吓㖭，睇怕冬季轉會市場開番，帕爾馬啲主將就……
今年三十八歲的公牛老將柏賓今季膝傷，已經唞咗十七場，最近佢嘅傷勢冇好轉，搞到冇晒心機，重話諗緊退休。其實新教練史佳斯接掌後，公牛開始重組，老將柏賓對公牛嘅價值實在好有限，自己退休總好過俾人踢走嘛，何況能夠喺公牛退休總算好頭好尾。