八方日前講過大摩班高層做善事唱聖詩，噚日中午十二點喺置地廣場，真係見到本港最富貴嘅唱家班。詩歌班成員來自大摩亞太區董事局，全部係董事總經理同執行董事級人馬，有成三十四人，包括亞太區主席兼首席執行官文禮信、亞太區首席經濟師謝國忠、董事總經理兼首席行政官顏麗生、總裁兼投資銀行部主管白德邁、同顧問董事傅善廷……
文禮信解釋，今次佢哋上台獻唱，係得到同事及客戶捐錢贊助，希望藉呢類活動，等所有員工都可參與，而唔係淨得公司捐錢。結果反應好熱烈，短短三日已籌到十五萬。佢哋噚日亦唱咗近十五分鐘聖誕歌。八方覺得班高層唱得唔錯，冇乜走音。文禮信話佢哋係天生嘅唱歌天才，所以只係練咗一次。連同員工網上拍賣，估計今次聖誕可籌得善款合共四十萬元。
（圖）文禮信同小朋友打成一片，詠唱聖誕歌。
傳真︰2623-9278
電郵︰