男友鋪路入M8着數啲<br>馮仁昭四圍超:向海嵐隨時迫走蒙嘉慧

男友鋪路入M8着數啲
馮仁昭四圍超:向海嵐隨時迫走蒙嘉慧

向海嵐近排主動公開同M8高層盧耀威(Ian)拍拖,原來Ian暗中幫女友事業鋪路,重拉攏佢出年約滿無綫後跳槽M8,一於男主內、女主外,以情侶檔姿態搵錢。
向海嵐𠵱家重係無綫旗下包薪藝員,但無綫一向畀唔少機會佢,估唔到佢拍拖後,Ian竟然做咗向海嵐嘅半個經理人,重私底下同女友斟洽工作。

一山不能藏二虎
而蒙嘉慧一向都係M8一姐,自從佢知道Ian會拉攏向海嵐加盟後,佢都明白人哋有男友撐腰,自己一定唔及以前咁得寵,況且一山不能藏二虎,所以如果向海嵐落實過檔,蒙嘉慧就計劃明年唔再續約,不過蒙嘉慧到𠵱家重大耍太極,佢話:「我都未約滿,唔知乜嘢事喎,冇嘢回應呀。」講真呀,向海嵐有男友撐腰,梗係着數啲啦,所以蒙嘉慧諗住鬆人亦都冇錯嘅!

周杰倫口齒不清唱歌有風格
台灣歌手周杰倫會為中央電視台演出春節晚會,日前佢為演出錄音,有消息指中央台認為佢唱歌時口齒不清,唱片公司老闆楊峻榮話:「我聽過公司的人跟我報告,周杰倫應該不介意這件事情,為了表演好,這些都是小事。」馮仁昭就覺得聽咗周杰倫啲歌咁耐,都知道佢嘅風格係咁㗎啦,所以唔應該介意。

原子鏸同朋友仔鑽研性知識
原子鏸同鍾麗淇噚日為英語話劇《生育女神》綵排,原子鏸喺個劇入面扮演恨生BB嘅女人,佢重要引誘老公做愛。問原子鏸平時遇到生理問題,會唔會向男友鄧健泓傾訴,佢就話:「我會同媽咪或者朋友講,我細個時,都係喺朋友度學性知識。」而鍾麗淇喺劇入面,重會演出一啲性愛戲份,佢話:「我排戲時都好尷尬,要同自己講要演得放啲。」

李逸朗口琴當武器
新人李逸朗(Don)噚日接受新城電台訪問,阿Don話成日會帶住個口琴喺身,一來方便隨時隨地作曲,二來又可以做自衞武器。原來佢有個童年陰影,就係九歲時曾經俾七至八個屋邨童黨塞晒啲西瓜皮同蕉皮入佢件衫度,所以佢覺得有個口琴喺身有安全感,口琴都可以係武器?奇!

周汶錡裸照風波惹官非
周汶錡、歐陽妙芝同Rosemary早前被登咗輯裸體照片,後來就炮轟話俾人用電腦加工。噚日嗰間出版社就發咗份聲明,話絕冇電腦加工一事,重已經發咗律師信畀周汶錡㖭。噚日周汶錡喺電話回應亦冇晒火氣,佢話:「我都交咗畀律師處理,總之乜都係你哋寫嘅。」件事發展成點,即管拭目以待。

劉曉慶瞞稅案開審
劉曉慶喺內地涉嫌瞞稅嘅案件,今日會喺北京嘅法院開審,劉曉慶因為喺橫店忙緊拍劇,所以佢本人唔會出庭,但佢男友阿峰就會代表曉慶公司上庭,早兩日阿峰為出庭事做準備,要暫時離開女友,獨自返北京同代表律師見面,對於開庭審呢單案,聽聞劉曉慶唔係好緊張,可以咁冷靜,相信阿峰畀咗唔少支持佢啦!

《我要你一筆out銷!》向海嵐
資料圖片

《唓!好叻咩!》蒙嘉慧
設計對白

周杰倫
資料圖片

原子鏸(左)、鍾麗淇(右)

李逸朗

劉曉慶(圖中)
資料圖片