由黑人影星愛迪梅菲（EddieMurphy）孭飛嘅惹笑驚嚇片《鬼咁多大屋》，今個平安夜就會喺本港上映，電影意念來自迪士尼樂園內甚受歡迎嘅鬼屋TheHauntedMansion，片中加入唔少特技效果，大搞古靈精怪恐怖氣氛！
愛迪喺電影入面飾演地產經紀，有日佢同屋企人到新奧爾良一間大屋參觀，點知嗰度原來住咗九百九十九隻鬼，當中包括管家、占卜師、保安、新娘，同埋靚聲合唱團！呢班嘩鬼一時搞到地動天搖、一時又開party，嚇到愛迪成家魂飛魄散，佢哋咁頑皮，原來同愛迪老婆身世有關！
《鬼咁多大屋》入面嘅鬼魂，全部由曾經奪得奧斯卡嘅《星球大戰》特技大師歷奇貝加（RickBaker）炮製，為咗令片中嘅嘩鬼有別於以往嘅特技片，視覺效果指導積仁韋德（JayRedd）喺鬼怪身上裝咗多個微型球狀玻璃，營造出自然發光效果，至於間古堡大屋，就由《芝加哥》設計師約翰邁亞（JohnMyre）同工作人員一手搭建而成，樓高四十一呎，所有擺設同家具都依足十八世紀製作，超級認真。