和黃（013）噚日突然發難，大升逾5%，帶動港股升破12500水平，收報12554，升156點，成交回升至159億元。
市場傳和黃下周一公布在本港推出3G業務，藉此消息炒作。香港人口約700萬人，相當於英國及意大利市場來說實在微不足道，而且推出初期難以獲利，阿虎諗唔到炒高的原因。ｉ師傅話，和黃在歐洲的3G業務，可能有好消息跟尾，噚日並非單炒香港3G，何況和黃屬落後股，反彈5%唔算好過份。
香港股民近期真忙碌，抽完長城汽車（2333）又要趕住認講中國人壽（2628），𠵱家重要去發掘紫金（2899），真係不愁寂寞。有個消息值得注意，傳聞國壽IPO，單係網上認購都超購逾130倍，而網上認購是不能借孖展，若傳聞屬實，即意味網上散戶動用1530億元真金白銀認購新股，照計可以列入世界紀錄。阿虎現時左手一本紫金招股書，右手一本國壽招股書，兩本挾埋足足4吋厚，唔知又斬咗幾多棵樹，抽完呢輪新股後，睇怕都要好好諗吓點樣善用呢堆廢紙。
近期招股活動耗紙量不少，紫金重話紙價上漲及供應緊張令招股書印唔切，唔知理文造紙（2314）同森信紙業（731）會唔會受惠呢？理文造紙噚日冇升跌，收5.85元；森信微升1.25%，收0.81元。
嘉新水泥（699）今日掛牌，暗盤價傳升至2.30元，較招股價1.48元高出55%。
阿 虎