向來走高性能房跑車路線嘅日本富士汽車，雖然一直不乏有鍾情Fans捧場，但始終有一定限數，致令本地銷路受到局限，不如其他亞洲地區及歐洲有咁好業績。
惟遲吓香港代理，會由現任新加坡及馬來西亞話事人GlennTan兼任總舵手，現階段雖未有建樹，惟亞Mark收到風，話日後富士汽車嘅賣點唔止局限於高性能，其全天候AWD四驅系統，亦會係賣點所在。故此，剛奪得日本CaroftheYear嘅Legacy車系，除保留原有高性能2.0公升TurboGT版外，聽聞Glenn會響明年引入埋2.5公升自然吸氣AWD轎車款，還有全天候SUV嘅3.0公升NA版嘅Outback到港㖭！
至於響越野車界蜚星國際嘅ImprezaWRX車系，雖然獲得唔少車迷認同，惟香港有錢買得起Impreza嘅人多，但真正懂得駕駛同操控呢部車嘅人倒真有限數，致令意外頻生影響聲譽。或許有見及此嘅關係，聽聞新人事新作風下嘅富士代理，正有計劃響明年引入1.5公升NA版嘅Impreza轎車，大有可能重會配備AWD四驅配搭；樣子既吸引又有高操控力，聽聞響Glenn嘅爭取下，呢款Impreza賣價會響15萬元樓下，大有機會跟豐田Corolla同本田Civic爭一日之長短呢！