新股狂潮中比較冇咁多人提嘅嘉新水泥（699），今日開嚟見人，對於嘉新首日掛牌表現會點？經紀陳只係講咗一個字，就係「掂」。
經紀陳話，嘉新水泥以1.48元招股，集資近3億元，初初招股時，市場對呢隻股信心好一般，皆因唔太清楚幕後台灣客情況，不過嘉新獲得寶島炒家全力支持，可能係本港新股熱潮感染到寶島炒家。
嘉新今次公開發售部份，超額認購315倍，搞到有成1.144億股由配售部份撥回公開發售部份，但經紀陳問過周圍好友，個個都話實際分得好少，加上家陣水泥股在芬佬界仍有一定市場，所以今日嘉新掛牌應該有睇頭。
噚日水泥股表現甚靚，好似上市以來都冇乜表現嘅華潤水泥（712）勁升13.98%，收2.65元；台泥國際（1136）亦升12.4%，收1.36元，至於水泥股龍頭安徽海螺（914）升0.10元，企硬於11.10元高位收市，好似一齊為嘉新今日造勢。
慕容小初