溫家寶總理首次出訪美國，猛咁吟詩，今次重開埋阿差嗰瓣，背誦泰戈爾，不過衰在太過緊張──梗係喇，講錯一句返去就俾人插死。
外界開始對溫總嘅出身大感興趣，特別係點解當年佢一臉哀愁，陪趙紫陽去天安門探望啲大學生，但最後竟可封相？
溫總嘅「不倒」確唔簡單，佢同「新中國」第一個總理周恩來嚟自同一間中學──天津南開中學。
溫總更係書香世家，阿爺叫做溫瀛士，當年鄉間自辦小學，重做埋校長，叔爺又係共產黨人老友。父親溫剛同老母楊秀蘭係教員。由於爺爺視佢為「家中之寶」，親自啟蒙，授其四書五經，所以國學根基好好；佢又受教地理嘅父親影響，考入北京地質學院學做專家，後來遇上文革被下放去甘肅。
機緣巧合，溫家寶因鄧小平搞幹部年輕化被提拔上京，重入埋中央辦公廳做咗主任，即係中南海「大內總管」，幾十年來，極之聽話，邊個做老細佢聽邊個，由胡耀邦、趙紫陽到江澤民、朱鎔基都覺得佢冇離共產黨經叛共產黨道，最後就交咗個總理重擔畀佢。嗱，呢啲就係中國式嘅「人才」嘞，想參「選」下屆特首嘅精仔，收到未？
傳真︰2623-9278
電郵︰