魔幻巨製《魔戒三部曲：王者再臨》下星期就會喺全球公映，我羅拉作為《魔戒》系列fans，自然相當期待，其實業內人士都認為今集係整個系列中最出色嘅一部，淨係電腦特技鏡頭（CGI）已經比上集《魔戒二部曲：雙城奇謀》多出一倍！上兩集都可以攞咗奧斯卡最佳視覺效果獎，可想而知《魔戒3》有幾厲害。
其實《魔戒》除咗以電腦特技見稱之外，工作人員做出嚟嘅模型以至化妝技巧都可以話係鬼斧神工，好似為半獸人化妝嘅專家，就要喺每個演員面上逐層逐層砌出成個造型，而戲入面嘅戰馬同城池模型亦幾可亂真，就連以CGI形式出現嘅咕嚕，美術師都會做個一模一樣嘅模型作參考！《魔戒》系列總共製造咗四萬八千件道具，難怪導演彼得積遜（PeterJackson）都話要開間博物館儲晒呢啲嘢。
講開彼得，佢話今年係拍攝《魔戒》七年以嚟最艱苦嘅一年，亦認為好難再拍一部比《魔戒》系列更好嘅電影。但係彼得對於即將開拍嘅《金剛》同盛傳嘅《哈比人歷險記》都相當憧憬，重計劃搵《魔戒》演員再合作㖭。