民建聯明年立法會選情吉凶未定，新主席馬力上位，好緊張傳媒對佢嘅評語，噚日同傳媒茶敍，席間佢特登借機呼冤，話報紙寫佢前日記者會表現太拘謹，其實佢唔覺自己係咁嘅樣。
其實，拘謹有拘謹好，因為中央會放心。一上台就風頭出盡，淨係左仔自己，都會眼紅狂篤背脊喇。正如馬主席明明五官端正，民建聯就有人指手畫腳，話佢前日上鏡個樣憔悴，鑑於人言可畏，馬主席佢噚日特登剪咗頭髮先見傳媒，但講真，馬主席表現仍不太自然，呢點佢都知，話自己喺幕後時，成日話黨友需要聽形象顧問嘅話，但到咗自己上台，就好抗拒。使乜吖，曾鈺成從政後期，個樣大細眼兼嘴藐，都毋須形象顧問，馬力又使咩？
馬力噚日爆料話曾經做過佢老師嘅曾鈺成，教中學時已經有鋪「窒人癮」，當時馬力有位同學姓康，名字嘅英文發音首個字母係K同F，簽名簽成「HKF」，就俾曾鈺成窒佢：「咩叫HKF，HongKongfoot（可直譯成香港腳）呀！」
傳真︰2623-9278
電郵︰