歐洲足協專登將歐冠盃最後一輪賽事，同日進行嘅比賽劃一比賽時間，希望做到公平。點知比錫達斯球迷諗出絕橋，下半場開波前將一卷卷廁紙掟入球場，希望阻延對車路士嘅比賽進行；等比軍可以睇住嗰邊嚟打。
除咗廁紙，佢哋重不斷向車路士場邊職球員掟橙、銀仔、甚至水樽，出盡奇招！不過足球場始終係講實力，「車仔」終於喺完場前入波，布拉格斯巴達亦小勝拉素，令比錫達斯幾經努力下仍然要出局！
搞咁多嘢都幫唔到隊波，重分分鐘累到球隊被歐洲足協判罰，你話有乜謂吖！話時話，呢場波喺德國中立場進行，會唔會有啲同英格蘭唔妥嘅德國佬，掟埋一份抽水呢？
根據Lycos公布，湖人球星拜恩擊敗網球大美人古妮高娃，成為𠵱家互聯網上最多人search嘅運動員。古美人過去幾年都一直雄踞互聯網嘅搜尋龍虎榜首位，今年突然俾高比仔取代，主要喺因為高比仔單轟動一時嘅強姦案所賜，正所謂好事不出門，醜事傳千里嘛！
相信唔多人估到阿積士同埋拉素呢兩支名牌球隊，最終響歐冠盃小組包尾，連足協盃都冇份踢；其實兩隊前晚都算贏形勢輸波。至於流浪主場輸畀彭拿典奈高斯，包尾就咎由自取。三隊波緣盡歐洲賽或者有助爭本土錦標，但拉素同流浪咁窮，連歐洲賽收入都冇埋就真係損失慘重。
碧咸話喺之前效力曼聯時同雲尼斯達羅好夾，於是就同皇馬會長佩雷斯講，希望對方可喺明夏買雲佬返嚟。不過，係人都知雲佬對曼聯好重要，如果佢離隊嘅話就認真大件事；而適逢碧咸同曼聯領隊費格遜一直唔妥，所以計我求大俠話，佢叫佩雷斯買雲佬，係想同老費玩嘢至真。
前日有報道話利物浦主席摩亞斯向領隊侯利亞發出最後通牒，講明如對方幫唔到球會攞下屆歐冠盃入場券，就等收大信封。但係，利記方面喺噚日又否認有咁講過，重話侯利亞嘅貢獻好大。其實，侯利亞個心臟不嬲都有事，唔通利記為免搞出人命，先至嗱嗱臨改口風？