民建聯新任主席馬力又開茶話會，盡訴心中情，話最憎佢個黨俾人叫做保皇黨，佢話如果葉國謙選區議會，有政府高官企喺度拉票，咁先至叫保皇，𠵱家冇，即是唔係。
馬主席咁講，表面上，雖然唔錯得晒，但佢或者失咗憶：喺區選之前，民建聯前主席曾鈺成上北京，由國家副主席曾慶紅高調親自接見，中央親自打氣，跟住派件楊利偉落嚟，任由民建聯人物企兩邊攝位影相。冇錯，民建聯毋須阿董班庸官同佢哋站台拉票，不過北京一場「孖曾會」，就係祖國最高領袖親自打印認頭，指指個鼻哥，再指指曾主席，示意香港人幫民建聯拉票，然後由民建聯協助阿董執政。咁嘅千萬金元超級大製作，民建聯唔係「保皇黨」，而係中國政府呢個現代秦始皇親自保住民建聯，即是「皇保黨」。
國家對民建聯有情有義，民建聯唔聽國家話又點講得過去？國家想民建聯全力挺董，馬主席唔聽，又點對得住國家幾十年心血米飯栽培。馬主席話，不止要支持阿董依法治港，重要支持阿董合理治港。即是話阿董有好多嘢唔合理。咁唔知「沒有國，哪有家」呢個口號合唔合理？如果合理，點解民建聯話要擱置立法？如果唔合理，點解馬主席喺知識分子報嘅專欄話，一日未立法二十三條，特區政府就一日違反緊《基本法》？
曾鈺成話，民建聯嘅黨綱，係支持二○○七年普選特首，並建議召開各黨派圓桌會議，邀請大陸四大惡人等「法律專家」落嚟旁聽。馬主席啱啱做咗呢個位，係咪應該大聲啲，向全港市民將曾前主席嘅呢條既定黨綱重申，並話畀人大常委四大惡人聽：二○○七年普選特首，係我哋親中愛國土共黨都支持嘅合法訴求，唔係甚麼「獨立」，你四個老盲毛，收聲！
馬主席如果夠膽代表香港利益，有誠意落實民建聯支持○七普選黨綱，佢過兩年出嚟直埋選，話唔定遲吓台灣總統同香港特首，都出現「雙馬起蹄」嘅新局㖭。
不過，持平而論，馬力係親中第一才子，又係紅學專家，佢以「辛維思」筆名論政，十幾年來大大話話都有一二百萬字。論才學、眼光、文采，董班子冇個及得佢哥仔。阿董應該即時邀請馬力舉行面對面峯會，向馬力請教吓治港之道至啱。
至於曾鈺成，留喺「痕正會」，唔知做乜？以後有乜重大政策，曾鈺成知道先，再通傳畀馬力，咁曾鈺成咪做咗民建聯嘅江澤民，而馬力只不過係胡錦濤第二？曾鈺成留喺「痕正會」，繼續同阿董共辱，唔通會好有快感？呢個生理問題，睇怕都應該由馬才子同佢嘅前度培僑英文老師協調吓咯。
傳真︰2623-9278
電郵︰