新股熱潮愈演愈烈，噚日重搞出銀行唔收黃表的大頭佛，小初發覺愈來愈多平日唔炒股嘅人，都熱衷於抽新股。
早前一眾經紀老友向小初極力推介的紫金礦業（2899），亦在傳聞四起及延遲後，公布招股詳情。
由於紫金突然有咁多傳聞，令到小初感到有多少戒心，都唔知去唔去認講。但經紀黃就拍晒心口，叫小初唔使驚，一於放心去馬。
經紀黃話，無論市場有乜嘢傳聞都好，本地股市並無金礦股，加上呢排資源股如兗州煤業（1171）、中國鋁業（2600）同江西銅業（358）股價升過唔停，而且紫金細細粒容易食，相信點都會吸引到芬佬。況且家陣小初只係抽新股，斷估都唔會分得多，風險高極有限。
另外，早前批過股冇耐的深圳科技（106），噚日又停牌話批股，但經紀陳話呢啲係圍內事，並無貨出街。其實上次隻股批完股之後，股權分布已出現重大變化，可能重有後着。
慕容小初