半紅花旦近排搭上娛樂公司嘅男高層，雖然佢都好公開咁喺人前同佢男友扮煙韌，但其實同佢男友同公司嘅一位女高層，睇見佢兩個拍拖就眼火爆，原因咪又係因愛成恨囉！
曾經參加過鬥靚比賽入行嘅半紅花旦，對於利用人真係有一手。話說佢啱啱出道時，女高層對佢好照顧，半紅花旦明知對方係女同志，但佢就一直對女高層嘅愛意欲拒還迎，因為佢重想借對方嘅權力嚟幫自己上位，點知後尾女高層跳槽去另一間娛樂公司，半紅花旦冇咗大靠山，個勢就即時謝晒。
不過，半紅花旦後尾搭上咗呢間娛樂公司位男高層，佢唔單止對戀情高姿態，重要喺呢個時候至同女高層表態，講明自己只係鍾意男人，女高層聽完後當然好傷心，難過之處重要係佢同半紅花旦嘅男朋友做同事，大家日對夜對。
不過，個女高層對半紅花旦都算有情有義，雖則得唔到佢嘅心，但仍然繼續喺工作上幫佢一把，所以半紅花旦都算好彩，做咗負心人都重可以左右逢源。
劉鑾雄同王穎妤嘅恩怨係最近嘅熱門話題，林建名前晚喺銅鑼灣出席《無間道Ⅲ終極無間》首映嗰陣，就俾記者追問知唔知邊個係幕後黑手，林建名唔多想答呢個問題，所以話自己冇睇呢單新聞，佢只話覺得大劉同王穎妤都唔好講咁多嘢，重話自己識得大劉，不過唔係好熟。
著名韓國影星張東健，前日喺韓國同國際知名嘅導演陳凱歌見面。陳導演睇過張東健主演嘅《朋友》，所以今次誠邀張東健演出新戲，佢先畀張東健睇吓正喺度籌備嘅劇本，重講定明年一月再邀請佢去北京。
而張東健亦好開心咁話：「呢個係我嘅光榮，我認真睇完劇本後，一定會去北京！」呢個組合咁新鮮，如果套戲拍得成嘅話，應該都幾值得期待。
台灣有報道話蔡依林同台灣主持人羅志祥（小豬）拍拖，蔡依林當然否認，小豬聽到重講笑咁話：「我叫她（Jolin）大哥，她那麼囉唆，我怎麼可能跟大哥談戀愛。」
蔡依林亦話：「是啊，他（小豬）那麼愛漂亮，我都叫她大姊，我們交情好到不可能成為男女朋友！」
佢兩個為咗否認緋聞，竟然嚟一招乾坤大挪移，咁咪即係又可以拍拖？
