嘉新水尼（699）派「成績表」，申請20萬股者實得6000股，申請40萬股者更只得8000股，相信長汽（2333）同國壽（2628）嘅分配比例重低，真係得啖笑！如果長汽同國壽掛牌當日，升幅唔係太大（在20%至30%都算係可接受之範圍），不如在市場追入，揸中線，有機會賺得更多。
噚日市況牛皮，仍然係國企同紅籌嘅世界，國企指數升72點，成交更大增到44億元，係10月9日成交52億元以來的第2高紀錄，估計國企升浪可持續到農曆新年之後。噚日兩隻重磅股果如所料，在高位回氣，而其他就繼續精采。
近期推介嘅股票，有兩隻調整完成，又再開車，一隻係中國（香港）石油（135），另一隻係中信國際金融（183），前者收1.27元，大升9.4%，後者高收3.875元，升5.4%。中油今次升破前高位1.2元阻力，可以上移止賺位持有，或到1.45元就回吐。
中信國金在高位整固多日，噚日以大成交突破3.825元的阻力，升勢確認，照度上去，初步目標4.4元，中線可見5字頭。呢一輪，基金收集得好有耐性，兼好有信心，果然一抽就上。
另一隻又係大行睇好嘅權智國際（601），由低位回升1成後，噚日略為整固，睇走勢，只要衝破1.2元阻力，就會爆炸性上升。𠵱家3G手機好缺貨，摩托羅拉都要在亞洲增加生產線，以應付和黃（013）對3G手機的需求。權智現時正生產緊智能手機，有芬佬估計，若權智能夠在3G手機市場分到一杯羹，就認真不得了！芬佬早前已預計權智可見1.4元，若有新發展，股價不難在現水平再翻一番。
遠東發展（035）上禮拜五有一手大成交1000萬股上板，跟住兩個交易日，股價就升咗20%；越秀投資（123）噚日亦有一手1000萬股大成交上板（成價0.88元），兩家公司同係以內地地產業務做主打，基金睇好中國資產，因此大手求貨。
其實，芬佬買越秀，都收集咗兩個多月，噚日高收0.88元，升5仙，突破大型三角形阻力，且有9910萬股（比前日大增480%）的大成交支持，短線上升目標指向1.1元。里昂早前發表報告，推介買入，目標價為1.31元。
郭兆誠