樓市喺下半年明顯轉趨熾熱，代理行話係轉勢，但好多人仍然有啲保留，希望睇定啲先入市，最近個別代理行高層已經「身體力行」，紛紛入市買樓，美聯物業營業董事羅國安啱啱就斥資305萬，買咗個又一村又一居單位，重話今次係97年後首次入市。
佢對蘭西講，自己喺97年賣晒手上嘅物業，剩番一間留作自住，今次入市主要係睇好後市，所以就算層樓比市價高少少都肯買。佢都有親身去現場望過吓先至落槌，但唔使5分鐘就拍板。個單位係又一居21座低層，面積821方呎，租客係經美聯租入單位，據悉紀錄良好兼交租準時，唔怪得佢咁有信心啦。
嗰單位租期至05年4月，月租1.3萬蚊。羅國安補充：「若果2年都唔加息，回報都算合理；若果加息就代表經濟好，咁單位就會升值啦！」
另外，美聯馬鞍山分行本周二開幕，就請嚟嘉華地產集團董事總經理呂耀華做嘉賓。不過，由於佢同大佬呂耀東有幾分相似，所以蘭西噚日出錯咗呂耀東張相，喺度向兩位呂先生致歉。圖三右呢位同美聯主席黃建業握手嘅就係呂耀華嘞。
恒基營業部總經理張炳強（洋名當勞）非常熟悉軍事知識。噚日恒基同傳媒餐敍，當勞趁大家聚首一堂，借機會推介《野外戰地遺跡》畀大家，本書由漁農自然護理署同郊野公園之友會合作，重點介紹本港嘅軍事遺迹，例如魔鬼山、舂砍角炮台、西灣炮台等。
書內圖文並茂講解遺迹以往發生過嘅事，例如日軍曾佔領魔鬼山13日；鋼線灣嘅機槍堡，就係𠵱家數碼港嘅一部份……書中唔少遺迹當勞話自己都去過，重問傳媒有冇興建一齊去㖭。
另外，恒基又送個明年月曆畀記者，相梗係
新地油麻地窩打老道8號係舊區重建項目，新地代理總經理周國賢話，好多喺附近做生意嘅街坊，就算搬都會搵番同區單位，所以「洗樓」嘅首要目標係附近嘅商戶，遲啲至洗埋住宅。佢重話，項目嘅意向價叫做「街坊開心價」。
周國賢好有信心咁話，個盤嘅特色唔使點講，啲街坊已經清楚晒，所以宣傳都唔會咁傳統淨係一味介紹，而會用廣播劇形式，請班人氣偶像飾演住喺窩打老道8號嘅年輕人，以地道「都市新貴族」引起同區年輕一族嘅共鳴。
臨近年尾，又係埋單計數時候。蘭西聽業界講，銀行手上嘅銀主盤數量可能比預期少，但唔係因為有客買咗。
業界解釋，原來銀行嘅銀主盤，部份可以容許原業主攞錢贖番，咁就少咗一個銀主盤啦！但係原業主既然有錢贖樓，層樓又點解會變成銀主盤呢？答案係呢啲單位之前因周轉不靈變成銀主盤，原業主𠵱家公司生意好番，或者喺金魚缸獲利，所以有錢贖樓。
其實呢類銀主盤好多時就算有客出到價，銀行都未必會賣，但又計埋落銀主盤條數度。近排股滙市向好，確實令一啲淪為銀主盤嘅業主有翻身機會。
美聯主席黃建業開金口話派發第14個月糧畀員工，佢嘅主要對手中原地產又點呢？蘭西聽聞中記高層開過會，通過明年會加人工畀夥記，幅度幾多就重未定。今年「沙士」期間，中原後勤減咗15%人工，唔知係咪最少加番咁多呢？
另外，傳聞今次唔係皆大歡喜式人人有得加，咁想有人工加就要努力啲嘞。聽聞過去幾年，就算樓市向下，中原不但冇減人工，重有得加㖭，只有今年例外。
蘭西
電郵地址：
