雖然未到聖誕，經濟發展及勞工局局長葉澍堃已經有新年行貨願望，就係希望失業率繼續下降，經濟繼續好轉，佢管嗰幾樣包括旅遊等等瓣瓣都掂。葉局長噚日同八方及一眾行家茶敍，無所不談，由屍爬到投票炒股，局長答得就答，但係永遠都係冇乜驚喜，永冇講多或者講大咗，一唔關佢事，就一定笑住將個波踢番畀其他問責同僚，認真高手，不過有啲嘢佢話唔可以講笑，就係涉及屋企人同埋同事，因為唔公道。
佢主打嘅吸引廠家回流有關文件已做好，下星期諮詢，會先嚟個試驗計劃，總之一切businessfriendly。
區議會選舉，住山頂嘅葉局長都有投票，當選嘅係自由黨嘅林文傑，佢承認啲市民期望大咗，要多啲溝通，又笑自己自從做咗高官，有六、七年冇買股票，「最近損失好大」。有錢佬係唔同啲，連王穎妤，自從同大劉反面，一個月都冇得食十萬銀鮑魚，夠損失大咯。
傳真︰2623-9278
電郵︰