樓市氣氛好，地產代理行頻頻有喜訊。好似上市嘅美聯物業，今年9月先至發過花紅畀員工，主席黃建業噚日話，個市持續好轉，過去7個月樓價升咗20%。淨係剛過去嘅周六至周一，集團工商舖連住宅共錄得大嗱嗱1800萬銀生意額，比起上個月同期，多成四分一。
正因為集團賺到錢，所以年底前會再發放多一次花紅，無論前線同後勤嘅員工，只要表現好，今年都會有14個月糧，可以過一個大肥年。聽講，成個集團有成3000幾個員工，若果人人有雙糧，實在皆大歡喜。
集團重睇好日後通車嘅九鐵沿線物業市場，將會喺馬鞍山至大圍開多10間分行，其中2間已經開張，令集團分行數目增至212間，希望佢哋搵錢亦「易一易」，多發花紅努力消費沖喜香港。
最近樓市旺番，代理行爭住擴充業務，排住隊咁開舖，噚日兩大龍頭代理行──中原同美聯，不約而同分別喺跑馬地同馬鞍山插旗。代理同發展商嘅關係密切，發展商就算呢排唔係賣樓，都會畀面到賀，中原就邀請咗新地周國賢出席，嚟緊多間代理行重會陸續有分行開幕，睇嚟發展商都要陪佢哋一齊忙。
樓市愈旺代理生意愈好，噚日先至喺跑馬地開舖嘅中原，已經有晒全盤港島區擴充大計。中原喺港島已經有43間分行，3個月內會增加至50間，嚟緊重會喺干德道、鯉景灣同赤柱都會開分行。
年近歲晚，唔少人多少會有啲手緊，見到利嘉閣執行董事廖偉強呢個派錢場面，大家一定好羨慕。不過呢個世界冇不勞而獲，有錢收背後原來係因為駿景園分行喺11月做到超過100萬佣，公司發獎金激勵士氣。
聽該行經理石家麟講，佢哋因為促成沙田美禾圍一幅屋地，同帶客去外區買一手樓，所以至有咁好數，重係今年第一次多過100萬佣嘅月份。佢重話已經攞咗筆獎金，請同事去食海鮮慶祝。
另外，世紀21麥當勞道分行上個月佣金過150萬，係「沙士」後新高，所以集團總經理鄧慶年就自資，請晒全分行20幾個同事擦餐勁。
新地油麻地窩打老道8號，今個禮拜開始做軟銷工作，早幾日就開始喺報章上，連載叫做《都市新貴族》嘅小說。宣傳攻勢重去到廣播界，邀請咗一班年輕偶像，包括鄧健泓、鄧麗欣同梁漢文，搞咗個廣播劇，主題就同連載小說差唔多，遲啲就會喺商業電台播，同發展商希望吸納啲年輕專業人士嘅目標相當配合。
蘭西記得，之前長實賣東涌映灣園嘅時候，都曾經用過廣播劇做宣傳，趙國雄同旗下嘅營業經理都有客串；今次輪到新地，唔知周國賢會唔會粉墨登場呢？
地產商租出商場舖位後，重要教埋租戶整嘢食？
據信和集團租務部總經理陳昌傑講，咁做係為咗提升商場質素，迎合市場變化。為求盡善盡美，陳總最近要周圍試菜，又要同租戶一齊研究菜譜。
陳昌傑話，好似屯門市廣場即將開張嘅一間菜館，同時提供京川滬美食，而集團計劃將商場嘅食肆租戶比例，由𠵱家嘅12至13%，增加至17%，佢透露有咁嘅計劃，主要因為食肆可以吸引更多人流。噚日蘭西見到高大嘅陳昌傑仍然好fit，完全冇「因工受傷」令身形暴漲，果然有「食力」！
蘭西
電郵地址：
