噚日ESPN爆料話女網球手「細威」莎蓮娜已經同意由Puma跳槽到Nike，合約價值最少高達五千五百萬美元（約四億二千八百萬港元），如果真喺堅料嘅話，「細威」唔單止超越家姊「大威」，成為全球最高薪價嘅女運動員；而且重做埋運動用品市場龍頭大佬Nike嘅一姐㖭，地位僅次於「老虎仔」同「占士大帝」！
眾所周知，Nike喺前年以破天荒嘅一億美元同高球天王活士續約五年，今年又以九千萬美元同十八歲嘅NBA狀元勒邦占士簽約七年，𠵱家「細威」張合約總值喺Nike所有運動員合約中第三高，身價竟然重高過「波神」米高佐敦（五年四千七百萬）同湖人巨星高比仔（五年四千萬），「細威」呢次真係名利雙收囉。
拜仁喺德甲對多蒙特前去阿爾卑斯山集訓，卒之贏四比一；於是佢哋照辦煮碗，喺歐冠盃大戰安德烈治前再去阿爾卑斯山。咁都未算，上屆佢哋着套歐冠盃版球衣（紅衫藍褲）踢歐冠盃，結果首圈出局，佢哋嫌呢套衫唔老嚟，所以會着聯賽版球衣（紅衫白袖紅褲）對安德烈治。
基輔戴拿模中場歷高喺今屆歐冠盃有好表現，引嚟熱刺等歐洲球會垂青。不過呢位克羅地亞球星就好唔客氣咁話熱刺未夠班，寧願留返喺基輔好過喎！記者再問有冇興趣學似佢國家隊前輩波錫咁去米杜士堡呢？點知歷高話米杜士堡連熱刺都不如㖭，真係大口氣！
意大利一電台最近由聽眾選出○三年意甲聯最差球員，結果由李華度及佩魯賈嘅薩迪卡達菲分膺第一、二位！我求大俠反而覺得排第三位嘅德國前鋒贊卡，先至係「實至名歸」！事關佢加盟烏甸尼斯十七個月，到周日至取得第二個入球，真係是但搵個踢後衞嘅都多產過佢啦！
今年歐冠盃參賽球隊實力似乎拉近咗，好少球隊可以提早篤定首名出線；今晚A、B組當然亂，肯定打得燦爛！而C及D組，咁啱都係第二位同第三位大戰，爭餘下一個出線席位。其中拉科作客燕豪芬，如果前者又着番大敗摩納哥三比八嗰場嘅橙色波衫，捧場客都咪話唔驚！