過氣港姐同個富豪拍完拖，但佢一直都唔認同富豪有過一段情，因為佢一直嬲富豪對佢唔夠專一，記得有次佢同富豪鬧分手，冇幾耐就搭上咗個江湖人物同靚仔歌手，實行同富豪「你做初一，我做十五」！
過氣港姐同江湖人物有段時間好癡纏，當時江湖人物重有其他女朋友，但過氣港姐同佢愛得難分難解，就當然乜都唔理得咁多，不過當佢發現江湖人物都唔多專一嘅時候，就梗係嗌交收場啦。
可能眼見個個男人都係咁花心，不如搵個有錢嘅好過，於是過氣港姐又重投富豪嘅懷抱，重同樣得到富豪愛錫㖭，送車送樓，又送珠寶畀佢，只可惜佢始終唔想同其他女人分享一個男人，最後就忍痛離開咗個富豪，總算係重新過自己嘅新生活。
女子組合Cookies噚日去咗尖沙嘴出席無綫《2003年度十大勁歌金曲頒獎典禮》，佢哋呢排都忙緊籌備新唱片，希望可以趕及年底或者年初推出。Cookies嘅Stephy話：「因為早排Theresa病咗，所以要遷就佢個期，𠵱家佢好番晒，狀態都好好。我哋早幾日重影埋唱片封套，會畀到歌迷新鮮感㗎。」咁快又可以開工，𠵱家啲後生女真係好精力！
噚日一班歌手出席喺尖沙嘴美麗華酒店舉行嘅《十大勁歌金曲頒獎典禮》記者會，大會宣布歌手候選金曲嘅走勢，男歌手暫時就由李克勤、許志安、陳奕迅平分秋色，各以三首歌領先，而女歌手就由關心妍獨佔鰲頭，以四首歌領先，不過其中有兩首歌係合唱歌，獨唱只係有兩首啫，唔知呢個氣勢可以持續幾耐呢？
呂方噚日到商台接受訪問，已經有六、七年冇出廣東碟嘅呂方，將會喺明年一月再戰樂壇，對於近日佢所屬嘅唱片公司BMA被傳財政出現問題，呂方就不斷問係唔係聽錯，重話會向羅傑承了解一下。呂方喺節目內又自爆有驚恐症，唔可以坐喺車嘅後座，亦唔可以一個人喺酒店房內，佢話由細到大都怕黑，所以都唔會睇醫生。
余文樂日前去到新加坡為新廣東專輯宣傳，佢向當地傳媒表示自己向來唔識得同人溝通，但做得藝人，呢方面點都要改善一吓，當地記者問佢點樣睇謝霆鋒頂包案，樂仔即刻發揮口才話：「我冇資格批評佢，咁短時間歌唱同電影事業都發展得好好，係個成功藝人，我亦視佢為我前輩。」
陳奕迅（Eason）爸爸陳裘大單官非就快了結，Eason就依舊開工，連續第二日去咗土瓜灣為拉闊音樂會綵排。戴黑帽、着黑褸嘅Eason行路依舊頭耷耷，對鏡頭左閃右避，對記者嘅問題就充耳不聞。本來Eason企喺𨋢口等𨋢，但係突然之間就轉身跑上一樓避記者。唉！點避都冇用啦，唔通今晚開騷唔見人咩？
