馬力做咗愛國保皇黨新主席，擊敗譚耀宗、陳婉嫻，好多人跌眼鏡。
不過，熟悉共產黨事務嘅，都會知道馬力上位，有迹可尋。馬力係培僑中學畢業，同曾鈺成後來嘅老婆楊女士同班，後來曾鈺成空降培僑，重差啲做埋馬力班主任㖭。
喺六七十年代，啲左校好左，當正港大同中大係帝國殖民主義反動學府，不過，後來政策有變，主張「我方」要派多啲「愛國尖子」打入呢兩間大學，就好似曾鈺成入港大咁，用一句當時嘅說話講，喺敵人嘅心臟插上紅旗，於是馬力身為暴動後第一批「愛國學校」畢業生，打入中大。喺嗰陣時，啲左校畢業嘅，個個都榮獲分配工作，數學好嘅就分配去愛國銀行做出納，英文講得兩嘴嘅就分配去裕華公司做售貨員，向遊客宣傳毛澤東思想，其他人等，就分配晒去做通坑渠工人、愛國工會飯堂炊事員，所以馬力當年都幾係一個神話。
不過，同樣培僑畢業，馬力黨性始終強啲，程介南一出事，馬力即時同佢劃清界線，走位速度之快，證明對形勢變化嘅觸覺好高。講到詭辯術，佢同曾鈺成都不分上下，不過講到台型學養，就始終係馬力高一皮咯。
傳真︰2623-9278
電郵︰