莎莎國際（178）出完靚業績後，股價重上高位，其餘零售股亦陸續公布中期業績，廸生創建（113）公布截至今年9月中期業績，盈利倒退85.5%，但噚日股價竟然不跌反升，唔通零售股真係好得咁交關？
廸生噚日最高見過5.80元，收5.60元，大升9.8%，成交金額有成1558萬元，明顯唔係乾炒。
小初唔明白走去問經紀黃，佢話小初有所不知，皆因芬佬同埋分析員都係向前看，唔係睇過去。廸生中期業績雖然下跌，但睇番沙士之後表現，營業額大幅回升，尤其係8至9月期間最為明顯。自由行繼續利好零售股，而大陸客又特別喜歡買廸生旗下的名牌靚表及靚衫，所以分析員認為廸生前景一片秀麗，一再調高目標價。
另外，由今年下半年開始，芬佬買入唔少零售股，聽講佢哋買入廸生嘅價錢唔算平，家陣年尾流流，芬佬亦要開始做櫥窗粉飾，以求有所交代。
經紀黃嘅結論係，今次廸生公布中期業績唔靚唔緊要，總之凡事要向前看。
慕容小初