柯受良昨日在上海逝世，他縱橫娛圈多年，在中港台三地均交遊甚廣，昨日他的死訊傳出後，不少圈中好友都感到十分震驚和悲傷，未能接受事實。袁詠儀、鍾鎮濤及范姜等都忍不住痛哭失聲，而劉德華平復心情後則說：「佢今次實在飛得太遠……」
柯受良（小黑）在娛樂圈打滾多年，交遊甚廣，九七年小黑飛越黃河時，不少圈中好友均有到場支持，包括劉德華、張學友、曾志偉、譚詠麟、梅艷芳、張敏、任達華及莫少聰等。昨日小黑的圈中好友得悉其逝世消息後，傷心之餘均表現十分震驚及難以接受，袁詠儀、鍾鎮濤與女友范姜都忍不住痛哭。
而與小黑相識十多年的劉德華，二人除合唱過《笨小孩》外，也合作過不少電影，華仔昨午得知小黑逝世後，表現得十分難過，一時未能接受事實，要花一段時間平復心情後，他才說：「佢今次實在飛得太遠，我相信佢有一日終會返嚟嘅，希望佢家人唔好太難過。」至於梅艷芳的助手Marianne則表示現時還不敢將消息告訴阿梅，她說：「我唔講住呀！點講畀佢知呀？真係可惜。」
任達華在電話中亦語調悲傷地說：「好愕然，好傷心，個心好唔舒服。」任達華表示與小黑相識幾十年，經常一起踢波、打高爾夫球及拍戲。任達華說：「上次佢發現有癌細胞，之後都冇事，大步檻過，點知今次……唉！人生真係好難講。而佢最令人佩服係好有義氣，朋友有事，可以不眠不休，蝕晒底都幫手。」
曾志偉與小黑認識超過二十年，昨日志偉驚聞噩耗感到十分傷心，對於有傳小黑是因飲酒過量致哮喘發作至死，志偉在電話中說：「我唔清楚佢有冇哮喘，不過自從佢患淋巴癌後，身體一直差咗好多，加上佢成日飛嚟飛去，搞到個人咁勞累，唉！諗唔到佢咁就去咗，真係接受唔到。」
而與小黑十分老友的譚詠麟則說：「好愕然，小黑值得我為佢驕傲嘅事係飛越黃河，係佢人生事業高峯。」
至於袁詠儀在電話中得知小黑去世的消息後，即不斷追問：「係唔係真㗎？點解會咁㗎？」她邊說邊泣不成聲，不能再繼續說話。另一方面，鍾鎮濤（阿B）昨日身在北京拍戲，他在片場聽聞小黑去世消息後，先是未能置信，其後便靜坐一旁流淚。
而身在香港的阿B女友范姜昨在電話中得知消息後，隨即失聲痛哭。後來范姜說：「我哋識咗小黑好多年，佢今年四月先嚟過香港我哋屋企玩，佢為人真係好有義氣㗎。」
此外，張學友則透過助手表示對消息感震驚，但他不願作任何回應。陳小春昨午出席《勁歌》頒獎禮記者會時，接到電話得知小黑去世，即時面色一沉，上台時又顯得心神恍惚，他說：「我同佢相識超過十年，不嬲表哥表弟相稱。」
採訪：陳月媚、蔡如育、魯萍、胡比
