法國標緻車廠於日前宣布推出全新407四門版嘅同時，原來亦有為其推出走旅行車路線嘅407SW型號；除造型與四門版一樣，擁有別樹一幟嘅個性外，其闊落兼靈活多變嘅車廂鋪排，亦成為焦點所在。
從外形而言，全新407SW與先前為大家介紹過嘅四門版相近，同樣以低斜嘅頭燈襯以闊大鬼面罩示人；但由於改用旅行車設計，故此車尾部份改用掀背式尾門配搭，並附以闊大嘅尾燈組合，一份誘人魅力油然而生。至於車廂方面，不但來得空間寬敞闊落，車內座椅更可按需要收摺放平，以增加尾廂載物容量㗎！與此同時，車廂設備齊全易用唔在講，廠方更為新車設有多個安全氣袋連充氣簾幕組合，以保障車上乘客安全。
與四門版一樣，走旅行車路線嘅407SW亦會備有多台引擎供選擇，當中包括有2.0公升直4（140匹）、2.2公升直4（162匹）及3.0V6（217匹），並附以5前速手波或6前速手波，以及4前速或6前速Tiptronic半自動波箱，性能表現可謂毋庸置疑。
若你對新車感興趣的話，就要留意新車嘅到港日期喇！