Robbie攬女生仔：我唔係基

英國壞孩子歌手RobbieWilliams嘅性取向一向備受關注，前日佢去到澳洲墨爾本一間夜店舉行記者會嗰陣，特登叫一班性感女dancer出嚟造勢，Robbie重高呼「我唔係基」！
Robbie啱啱去咗澳洲為巡迴演唱會最後三場作準備，前日佢喺墨爾本SpearmintRhino夜店舉行記招，同場有大班性感dancer着住白色短褲同埋印住「IloveRW（指RobbieWilliams）」嘅背心現身，佢哋重幫Robbie點煙仔㖭。

要求馬桶特別處理
成個大王咁嘅Robbie話：「我會做任何嘢去證明我唔係基！」Robbie透露明年二月就三十歲，佢好滿意自己嘅事業，𠵱家係時候成家立室，佢重諗住搵個女人同佢生番幾個細路㖭。
Robbie話完成澳洲三場個唱之後，會嘗試做啲新嘢，但一定唔會演戲，佢話：「我冇興趣做戲，因為呢樣嘢係好愚蠢同好悶嘅工作，我亦都唔想同啲怪人做呢啲咁怪嘅嘢！」
此外，有消息話Robbie去到澳洲之後，要求酒店同演唱會場地提供嘅馬桶，全部都要經過獨立衞生處理，以免其他人坐過之後，將啲細菌傳染畀佢喎。