民建聯新任主席馬力，終可扶正出台，代替自稱同阿董「有辱無榮」嘅曾鈺成，消息傳出，土共圈子嘅反應，係憂喜參半。
有啲愛國左仔話，呢條友一向沙塵、恃才傲物，唔多將勞動人民羣眾放在眼內，換句說話講，就係作風太過「小資」，兼且有濃厚個人英雄主義思想。叫佢出嚟直選洗樓，睇怕小馬哥覺得幾委屈。呢次話要「以民為本」，咁市民個個想普選特首，馬力又敢唔敢以民為本呢？
但另一派就話，馬力始終都係中文大學中文系文學士，喺愛國小圈子裏面，叫做有兩滴墨水之人。
點都好過蔡素玉、梁富華呢批帶有共幹色彩嘅人物，何況馬力雖然係國家喺香港重點栽培嘅愛國新秀，不過佢啲英文，聽講重好過曾經留學倫敦大學一年、研讀勞工關係嘅譚耀宗，將來見外國駐港領導，同董建華猛講好說話，兼宣傳祖國點偉大，喺溝通方面可以較為與國際接到軌。
有左派朋友講：馬力做咗民建聯主席，愛國力量深慶得人，佢嘅愛國立場十分堅定，反英倒肥彭、棒打李柱銘及民主派，多年來久經考驗。八方問：李登輝當年夠成功喺國民黨潛伏咗咁耐咯，後來做咗國民黨主席，咪一樣出賣國民黨？對方愕咗一愕，話：我哋愛國陣營位位都經過國家考核，照過X光、驗過血，連腦部磁力共振都做埋，馬力絕對唔係李登輝，只會係愛國陣營嘅陳水扁：年富力強，頭腦靈活識走位，民建聯有咗馬力，即是好似香港六百萬人有董建華領導，明天一定會更好。
既然係咁，馬力應該自動做埋行政會議成員至啱，無謂累到曾鈺成繼續陪埋呢個政府受辱落去，連戰就㩒死小馬哥啫，唔通曾主席都忌埋？
今年嘅特區政治：阿董屬牛、民建聯新主席姓馬，平機會暫代主席嗰個女人叫做