港股連跌5日，恒指唔見咗279點，噚日升一日，已進帳216點，收復77%失地，而成交又上番134億元，港股市底之強，市場游資之充裕（長汽已凍結近900億元），可見一斑。期指更大升300點，高水67點。
噚日大市升勢好全面，藍籌主要由滙豐（005）同中移動（941）帶動，睇大行同基金買貨之狠，恒指有力在年底前再寫下高位。至於國企股，在「國期」上市第2日先全面上揚，特別係重磅股，升勢更為悅目。國企指數以4332點全日高位收市，大升224點，升幅5.4%，成交更大增到33億元。
芬佬看好國企後市，全情投入，但重磅股呢輪升咗唔少（重一路咁創新高），雖然國企指數睇4600至5000點，但大價股起得急，如果停一停、消化一下，後市可以升得令人更有安全感。由於大升勢已成，重磅股若進行整固，則落後國企有機會接力而上，追回升幅。
石化產品獲准加價，令一路已強勢的石化股，升勢更轉急勁，北京燕化（325）最犀利，高收2.3元，大升8.2%，而前日已升10%的鎮海煉化（1128），終突破6.0元大關，再升3.4%；至於吉林化工（368）則升6.7%，上海石化（338）升5.5%，儀征化纖（1033）亦升4.5%。
過去一個月，起得最急嘅石化股係鎮化，升幅27.7%（同上月中高位比較），燕化同上石化緊隨其後，分別上升22.3%同21%，吉化同儀征就大落後，只係升得3.9%同2.2%，如果唔係噚日發力，可以話，成個月都冇進帳。
過去兩個月，吉化在1.3元至1.55元間形成徘徊區，噚日破位而上，且成交大增5倍到1.43億股（係8月18日以來的新高紀錄），以量度升幅計，短期目標指向2.025元。
吉化業績靚，有力支持股價上升。今年上半年，吉化已轉盈，賺2.43億元人民幣，估計全年盈利5.2億元人民幣，每股盈利折算14.1港仙，即使以石化股平均15倍PE計，吉化已可見2.1元。
吉化上月重組，以1.59億元人民幣的應收帳，換取母公司的有用資產，而在追收之後，應收帳已由年中的5.95億元人民幣，大幅減至1.83億元人民幣，預期日後仍會有重組行動，對股價帶來刺激。
郭兆誠