重有大半個月就踏入2004年，近排有唔少代理商，經已紛紛推出2004年Facelifted版新車，而早前曾以3萬5千元出售Colt作招徠，掀起股市以外入票超額認購嘅三菱代理，剛啱又運嚟新版Lancer，並分別有1.5公升四門版嘅MX型號，以及配用高性能1.8公升Turbo偈嘅T-Touring呢！前者改用咗台新偈，雖然馬力數值給調低，但據知低、中轉表現，尤其係起跑加速，明顯爽朗又突出，加埋全新車頭及大燈設計，看來更具跑車氣息外，又有四輪合金軨、原廠霧燈、尾翼，還有車廂桃木修飾，匹配一套無段變速CVT自動波，都不過賣13萬9千幾咋！
至於後者部五門Sportwagon，同樣以新面孔示人，加埋全車大包圍、15吋合金胎軨外，車廂布局重取材自Evolution嘅GTA版本，跑車軚環上重加有+/-按鍵，又有4前速真皮波棍配搭同恒溫冷氣等裝備，定價18萬9千多元，想買車嘅你不妨考慮吓噃！