一年一度嘅聖誕節重有兩個幾禮拜至到，但樓盤嘅慶祝活動已經等唔切，電盈貝沙灣二期禮拜日已經邀請咗一批買家，出席豪華晚宴，搶先搞首個聖誕活動。
貝沙灣嘅活動一向都好有品味，今次設宴款待買家之餘，重請到14位名模示範新款婚紗，有歐陽妙芝、周汶錡同樂基兒等出席。樓盤之前都有邀請過好似鋼琴王子李雲迪、男高音莫華倫表演，今次請嘅嘉賓更大堆頭，務求氣氛夠晒普天同慶。
電盈基建主席李智康同一班名模特別投緣，今次都唔例外，可以襯番佢自己之餘，同個盤嘅格調一樣咁襯，聽講話佢重參與入口嘅布置，揀咗啲鮮花做裝飾，等聖誕氣氛再濃厚啲。當晚大約有150人出席，可以一次過睇晒咁多靚女，相信已經係好好嘅聖誕禮物。
發展商為旗下商場大搞聖誕裝飾，都係希望可以帶旺人流，為商場租戶提供更多做生意機會。好似恒基嘅將軍澳新都城商場，就用咗200萬搞聖誕裝飾，佢哋估計聖誕期間，商場人流可以增加一至兩成。恒基除咗用噴雪音樂盒作招徠，重喺聖誕期間舉行「魔戒新都城」活動，大送「魔戒」戲票。蘭西聽聞開業冇耐、面積近兩萬方呎嘅玩具反斗城，今個禮拜重會喺商場搞玩具展覽，場地面積約1萬方呎，都唔少嘢㗎。
近排馬不停蹄推銷將軍澳蔚藍灣畔嘅信和營業部總經理韓家輝，噚日可謂雙喜臨門，適逢佢加入信和集團一周年，同時又係蔚藍灣畔第1期700伙賣清光嘅日子，各大代理行都戥佢高興，噚日喺售樓處爭相同佢慶祝，留個紀念。
韓家輝話，第1期700伙已套現15億，將會同地鐵、嘉里商討第2期銷售事項，但強調一定會加價。賣出嘅分層單位呎價2500至3850蚊，第7座5房呎價3600至4300蚊。難得有此成績，佢下個禮拜一起會外出度假充吓電，返嚟再搏殺。
聖誕節對唔少人嚟講，係消費玩樂嘅日子，美聯美善會就打算雪中送炭，向不幸嘅一群送上關懷，今個禮拜五會去探訪麥當奴叔叔兒童之家，同一眾小朋友歡度佳節，重會大派玩具。
今次啲玩具係由女性雜誌《Jessica》捐贈。美善會重整咗張答謝卡，由美聯執行董事張錦成同董事林鳳芳，親手送畀《Jessica》行政總裁吳旭茉。總之肯做善事都應該多謝嘅。
潮流興開咪，中原Addy（黃偉雄）今日就會喺QuamTV亮相，主持10集「Addy會客室」，邀請嘉賓暢談成功故事，同分享投資心得。
頭炮嘉賓係資深證券界前輩蔡陳葆心，跟住嚟重有港姐張瑪莉、兒歌創作大師陳以誠、中華廠商聯合會副主席尹德勝，同太平洋恩利主席黃裕翔……特色在於所有嘉賓冇一個係嚟自地產界。
蘭西
電郵地址：
