長城汽車（2333）截止認購，據初步消息，超額應該逾400倍。中國人壽（2628）噚日派表，熱潮肯定更高漲，由於長汽已凍結了逾600億元資金，國壽做孖展嘅銀根明顯扯緊咗，息率更升到3至4厘，重係先到先得。
外圍不振，加上資金大舉流走，令到港股低開後都無力反彈，結果連跌5日，恒指收12177，跌137點，成交亦只得100億元。期指開市早段，原本只跌60多點，但突然有一大沽盤，聽講數目逾千張，一「隊」出嚟，期指應聲大跌200點，就此不能翻身，全日在低位爭持。不過，同芬佬傾開，佢哋認為大市調整已差不多，今明兩日會到底，中線仍要看好。
「國期」登場，成交1367張，冇預期咁旺，大戶亦冇大手造作，國企則個別發展，指數升31點，全靠兩隻重磅股頂住，中石油（857）升5仙，中石化（386）亦有1個位進帳，而最突出嘅亦都係石化股，鎮海煉化（1128）高收5.85元，大升10.3%。
芬佬上禮拜講到明，話聖誕同新年臨近，內地遊客大增，旅遊概念股會炒番轉。噚日，有關酒店同零售股份，果然齊齊開車，酒店股中的富豪（078）同遠東發展（035），就大升13.6%同11.1%；而零售股就以景福（280）最勁，升13.1%，六福（590）同恒豐金業（870）分別有6.7%同6.2%進帳。呢兩日推介的遠展同恒豐金都俏升，前者有大行報告推介，目標2.5元；後者見基金已做工夫，相信唔到2字頭，唔會收手。
零售股當中，東方表行（398）係另一隻升幅屬「可大」嗰類，買得過。東方表中期業績（03年9月底止半年）下周二（16日）宣布，雖然第3季有自由行沖喜，但「沙士」影響都幾深，所以千祈唔好有期望，但下半年自由行發揮威力，全年度盈利應該有增長，以PE約7倍，息率有3厘幾，揸中線，好大機會財息兼收。下年度，保守估計盈利有20%至30%增長，PE更降至5倍。
東方表上禮拜剛突破長達3個月的上升三角形阻力，整固幾日後，噚日再發力，高收1.83元，升8仙，成交大增1.4倍，升浪確認，以量度升幅計，目標指向2.6元，預期升幅42%。
郭兆誠