美國樂壇小天后BritneySpears，最近馬不停蹄咁去到世界各地宣傳全新大碟《InTheZone》，噚日佢去到漢城出席記者會嗰陣，特登着上韓國傳統公主服裝出現。
Britney走紅之後，雖然有唔少負面新聞，但佢每次去美國以外嘅地區做宣傳嗰陣，通常都係好識做，務求𠱁啲海外傳媒同fans開心。
好似佢前年去日本宣傳嗰陣就着和服見人，噚日佢係第一次喺漢城舉行宣傳活動，就花咗大半個鐘，着咗套好鮮豔嘅粉紅大韓民國傳統服裝出嚟，原來呢套係高麗公主衫，Britney話：「我第一次着韓國服裝，好享受佢嘅貴氣，自己真係好似個公主。」
前晚已經到漢城嘅Britney，步出仁川機場嗰陣有成二百fans接機。由於漢城落緊大雪，Britney抵埗後只係留喺酒店冇出去玩，但佢噚日竟然喺記招上攞完白金唱片就話：「韓國啲風景好靚！」
原來Britney仍然未治好同前男友JustinTimberlake分手嘅心病，佢承認早排缺席愛丁堡舉行嘅MTV歐洲音樂頒獎禮，除咗因為唔舒服之外，重因為怕面對面見到Justin會好尷尬咁話。
講開Justin，佢原來只係一個大細路，上星期六佢深夜帶埋保鑣拉大隊去到一間百貨公司買嘢，佢原來係買好多玩具送畀自己，又買其他嘢畀佢八十個朋友，總共使咗千三萬港紙。
記者劉梓恩漢城直擊