陳奕迅（Eason）嘅爸爸陳裘大任職房屋署總屋宇裝備工程師，佢被控十四項公職人員收受利益罪名，噚日控辯雙方進行結案陳詞，如無意外今日陪審團退庭商議裁決，應該會有結果。喺佢爸爸嘅官司期間，Eason喺人面前表現得好似好冇嘢咁，重反常到好似好開心，其實佢同爸爸關係向嚟好好，佢心入面有幾擔心，大家可想而知。
噚日Eason如常工作，佢中午十二點離開跑馬地嘉崙臺屋企，去咗土瓜灣木廠街嘅排舞室，綵排商台《拉濶音樂會》，落車時戴住黑超嘅Eason頭耷耷，好似唔係幾想記者影到佢個樣咁，記者問佢擔唔擔心爸爸，夜晚會唔會見爸爸，Eason都冇出聲，不過就保持住笑容。佢噚晚七點半收工，之後就返咗屋企。
台灣女子組合S.H.E前晚喺無綫將軍澳電視廣播城，出席《2003年TVB8金曲榜頒獎典禮》，佢哋獲頒「金曲獎」，成員之一嘅Ella因為早前受傷而缺席，得番Selina同Hebe一齊嚟攞獎。佢哋拎完獎返回後台，Hebe忍唔住嘟長個嘴，作狀錫錫Selina，一啲都唔擔心惹來同性戀嘅傳聞。
肥媽同歐陽海璇噚日一齊出席有線活動，肥媽同記者講近日有人搵佢做瘦身代言人，但係𠵱家重傾緊酬勞問題，佢重強調自己起碼要收七位數字酬勞先有得傾喎！瘦身成功嘅話，可以減五十至七十磅！如果真係咁犀利，肥媽重會着泳衣亮相，不過就唔係比堅尼，肥媽話：「最多咪一件頭！」到時真係咁弗嘅話又使乜收埋收埋吖！
Twins前晚去咗無綫將軍澳電視廣播城出席《2003年TVB8金曲榜頒獎典禮》，蔡卓妍（阿Sa）呢排都成日病，佢日前先至出院，但又忙住趕戲。阿Sa呢排休息唔夠，身體抵抗力好差，但係反而工作就接住嚟，馮仁昭覺得佢名副其實係財多身子弱。
原本今年《歡樂滿東華》搵吳剛返番禺捉鱷魚籌款，搞搞噱頭，雖然吳剛呢排好勤力咁返番禺個鱷魚養殖場練習，但馮仁昭收到風，話吳剛今次捉鱷魚美夢可能再落空，因為捉鱷魚始終有危險，到目前為止冇保險公司肯受佢保，睇嚟無綫多數都會取消呢個項目。
