呢兩日賭歐冠盃，相信唔少球迷都會博條跨日過關，或者落定早飛。我求大俠建議大家，呢一輪賽事唔值買隔夜早飛，睇埋今晚戰果，分分鐘聽日重有心水！
事關呢一輪係分組最後一輪賽事，過埋今晚就可確定F至H四組八支首次名出線隊伍。咁即係話聽日進行賽事嘅A至D組球隊，大可睇定曼聯、皇馬呢啲強隊究竟係首名定次名出線，從而作出「走線」部署。好似祖記、拉科及摩納哥等，家陣重可以走位，真係要睇定啲至好呀！
當然，聽晚有直播嘅B組兩場大戰，阿仙奴同國米等，𠵱家連出線都成問題，戰意一定有，睇啱都可提早出擊！
前晚西甲聯華倫西亞對畢爾包，完場前五分鐘真係扣人心弦，當時華倫重贏緊二比一兼得到十二碼，點知主射嘅魯費迪宴客！轉過頭又到畢爾包得到十二碼，輪到烏沙斯主射又唔入！嘩，呢一來一回真係嚇到我求大俠成個醒晒，事關我哋名家華度貼咗條「讓球主客和」嘅「和局」嘛！
李華度早排同AC米蘭解約之後大玩神秘，一時間無任何傳媒知道佢行蹤。直到早幾日，終於有傳媒踢爆原來佢正喺聖保羅一條村落度靜思。暴風雨前夕通常都出奇平靜，據李華度經理人講，佢隨時會發表今後去向宣言，收埋自己純粹係唔想畀傳媒亂估亂寫嘢喎。
AC米蘭由於已經喺歐冠盃分組賽出咗線，一於少理星期二嘅最後一場分組賽，有七名主力好似馬甸尼、尼斯達同舒夫真高等，已出發去日本，備戰星期日對小保加嘅洲際盃。咁AC米蘭星期二嘅對手切爾達梗係好筍啦，而同組嘅阿積士要出線就要靠自己打贏比利時嘅布魯日喇！
隨住轉會市場重開嘅日子愈近（下個月），好多英超球會都傳出會增兵，其中有傳效力荷甲聯燕豪芬嘅塞黑前鋒基斯文係曼聯同埋利物浦嘅目標。我求大俠唔係睇小基斯文，但係人都知荷甲聯嘅水平有幾高，基斯文喺荷甲威，唔代表佢真係好掂，若搶到太貴，「雙紅」要三思。